Blogs – Gastroenterology

मद्यपानामुळे होणारे यकृताचे आजार : जास्त प्रमाणात आणि दीर्घकालीन मद्यसेवन केल्यामुळे यकृताचे आजार होतात. मद्यपानामुळे यकृताच्या रक्त तपासण्यांमध्ये दोष आढळणे,फॅटी लिव्हर (यकृतातील चरबीचे प्रमाण वाढणे),हेपॅटायटिस,लिव्हर सिऱ्होसिस ,कर्करोग होणे इत्यादी व्याधी उद्भवतात.

यकृत हा आपल्या शरीरातील सर्वांत मोठा अवयव आहे. यकृताचे वजन शरीराच्या एकूण वजनाच्या १५० म्हणजेच ढोबळमानाने १२०० ते १५०० ग्रॅम असते. शरीराच्या उजव्या बाजूस बरगड्यांमध्ये यकृताची आंत रचना असते. चयापचयाच्या सर्व क्रियांमध्ये यकृताच्या महत्वाचा वाटा असतो आणि त्यामुळेच यकृताला शरीराची केमिकल फॅक्टरी असे संबोधले जाते आणि ५०० हून अधिक कार्य यकृत करत असते. शरीरातील विशेषत: आतड्यांमधून येणाऱ्या अशुद्धी यकृतात शुद्ध केल्या जातात (अमोनिया इत्यादी). तसेच शरीरातील प्रमुख प्रथिने तसेच रक्त गोठविण्यासाठी लागणारे घटक यकृतात बनविले जातात. अशी अनेक कार्य यकृतात होतात. शरीराच्या रोगप्रतिकार शक्तीचाही यकृत एक प्रमुख घटक आहे.आणि म्हणूनच यकृताला आजार झाल्यावर शरीरात अनेकविध गुंतागुंतीचा प्रादुर्भाव होतो आणि काही प्रसंगी शरीराचे अस्तित्वही धोक्यात येऊ शकते.